Mentholatum ACNES Medicated Powder Lotion 曼秀雷敦 暗瘡護理爽膚液

搖均後倒出黎, 有好多細緻粉末

乾後粉末幼細睇唔見, 唔會白左好似搽左粉咁

價錢：$ 36.9 (o係萬寧同watson's都會搵到佢架喇)

使用時間：2 weeks

我o係今年夏天既時候, 試過有日突然出左好多小小既暗瘡, 係好痕又有d痛既。咁我平時係無乜暗瘡既人, 所以比呢d小暗瘡殺左一個措手不及! 手邊一樣抗痘產品都無, 又唔知邊d好(平時唔會留意到嘛), 唯一有印象既暗瘡野就係得呢枝架咋...

我當日買左佢就馬上開佢用黎急救喇。我係洗完面後, 就倒一d o係掌心, 用手掌按上面度既。上面既第一下感覺係: 爽! 搽完佢會有一種涼浸浸既feel, 呢個feel都會last一陣既, 唔會話咁快無左。d小瘡因為比我抓過破皮, 所以搽果下會刺痛! 不過由於當時d小瘡已經痕到我失去左少少理智(而家回想起都覺得好痕XP), 所以果d刺痛其實好痛快! 而呢枝toner都真係work架, 我搽完第二日d瘡已經感覺平伏左, 用多個星期就好左好多喇!

雖然呢枝野真係好work, 但我一直到左而家都無話想點用埋佢。首先正如我講過, 我其實平時無乜暗瘡架, 所以度過左果次既crisis之後, 呢枝野已經無乜點用得著(當然我都唔希望再用得著喇)。同埋呢枝雖然抗痘我覺得好掂好得, 但係對於我呢d乾人黎講, 佢真係好乾! (唔通乾人就唔可以生暗瘡?) 而當我想搽返保濕cream順一順既時候, 另一個問題又出現喇: 呢個toner入面既吸油粉末, 會同保濕product結合, 形成一d好似擦紙膠碎既粉粒o係面上, 一捽一搽就成面都係。於是我用親呢枝野都會陷入兩難: 淨係用佢, 就會乾到好似抽乾水咁; 用埋cream/lotion 呢, 就會一面都係擦膠碎。哎...所以我忍左兩個weeks, 等d皮膚一好轉就馬上轉左佢喇。我諗如果佢可以skip左d 吸油粉末, 又或者係油性暗瘡皮膚既話, 呢枝野其實會幾好用架。(後來受人指教, 原來將呢樣野濕敷用效果仲正, 不過我未試過, 有機會試試先!)

Olay moisturizing cream (sensitive skin)滋潤保濕霜(敏感性肌膚專用)

價錢：$5x 100g (我o係萬寧, watson's同卓悅都有見過, 價錢好似都差唔多, 應該都係卓悅最平)

使用時間：一年（都仲未用完100g XD）

我本身算係乾人, 呢隻cream 我o係夏天用會覺得有d lup(外油內乾既膚質:-p), 但o係而家呢d秋冬時間用真係啱啱好! 我係上年秋天買, 一直用到而家, 呢100g都仲有小半瓶剩(本來係多到滿晒)。秋冬時我會日日早晚都用佢, 用完化妝水趁塊面仲濕時搽, 呢個cream就會好好推。我好鍾意佢water base既乳霜質感, 搽完真係保濕到又唔lup, 感覺係真係幫肌膚增加左水份, 唔似其他cream有油份咁, 搽完塊面油lup lup唔透氣。同埋佢無香料無色素, 好鬼溫和, 亦好得我歡心呀! XD

而家天氣都開始乾, 我晚晚搽完佢, 第二朝起身都仲feel 到塊面好水潤。個滋潤感覺亦last得耐, 唔會好快無左。我而家都打算係靠佢再加 肌研極潤化妝水黎過冬, 不過如果係"超級乾人", 我就唔肯定呢瓶夠唔夠力喇, 因為我只係一個"普通乾人"咋。同埋100g真係好多, 下次用完呢瓶我都係買50g既size算喇! XP

我記得olay 呢條basic保濕line仲有隻係lotion黎既, lotion係企身樽, cream就係瓶裝。我兩隻都用過, 我覺得lotion就係比無咁乾既人用, 而cream會潤過lotion。同埋我會特登揀返for sensitive skin 既黎用, 因為original version既香味都幾強下架!